Mançester Yunayted Premyer Liqada ardıcıl üç oyunda qalib gələ bilmədikdən sonra nəhayət ki, İpsviç Taun üzərində vacib qələbə qazandı. 3-2 hesabı ilə başa çatan bu görüşdə kapitan Bruno Fernandes əsas fiqur idi. O, komandasının hər üç qolunda iştirak edərək vacib assistlər etdi və Mançester Yunaytedin hücumuna liderlik etdi.
Oyunun başlanğıcı isə Amorimin komandası üçün heç də asan olmadı. Dördüncü dəqiqədə meydan sahiblərinin müdafiəsində anlaşılmazlıq oldu və Jaden Filojene boş qapıya topu göndərərək İpsviçə erkən üstünlük qazandırdı. Bu epizod Mançester Yunayted üçün oyunun çətin keçəcəyini göstərirdi.
Lakin qırmızı şeytanlar tez toparlandı və 22-ci dəqiqədə Bruno Fernandesin cərimə zərbəsindən sonra rəqib oyunçunun öz qapısına vurduğu qolla hesabı bərabərləşdirdi. Cəmi dörd dəqiqə sonra yenidən Fernandesin künc zərbəsindən sonra meydana yaranan qarışıqlıqdan Matthijs de Liqt yararlandı və Mançester Yunaytedi önə keçirdi.
Bu üstünlük Amorimin komandasına daha rahat oynamaq imkanı yaratmalı idi, lakin komanda ilk hissənin sonlarına doğru böyük səhvlərə yol verdi. 37-ci dəqiqədə Dorgu VAR qərarı ilə qırmızı vərəqə aldı və Mançester Yunayted meydanda 10 nəfərlə qaldı.
Bu fürsətdən istifadə edən İpsviç birinci hissənin əlavə vaxtında hesabı yenidən bərabərləşdirdi. Filojene ikinci qolunu vuraraq fərqləndi – onun cərimə meydançasına göndərdiyi top hamını keçərək qapıya daxil oldu.
İkinci hissənin əvvəlində Mançester Yunayted qələbə qolunu vurdu. Fernandes növbəti dəfə künc zərbəsindən ötürmə etdi və Harri Maqvayr baş zərbəsi ilə topu tora göndərdi. Oyunun qalan dəqiqələrində İpsviç bərabərlik qolunu axtarsa da, Amorimin komandası müdafiədə inamlı dayanaraq üç vacib xal qazandı.
Matçdan sonra Bruno Fernandes sosial mediada komandasının qələbəsini qeyd edən şəkillər paylaşdı. Bu postun şərhlərində Mançester Yunayted azarkeşləri onun möhtəşəm oyununa görə təşəkkürlərini bildirdilər. Maraqlı məqamlardan biri isə Amad Diallonun kapitan Fernandesə göndərdiyi mesaj idi. Hazırda zədə səbəbindən meydana çıxa bilməyən Amad, postun altında iki ürək işarəsi emojisi qoyaraq Fernandesin komanda üçün nə qədər vacib olduğunu vurğuladı.
Komandanın baş məşqçisi Amorim də qələbədən sonra açıqlama verərək azarkeşlərin oyun boyu komandaya dəstək olmasından məmnun qaldığını bildirdi. O, komandasının sona qədər mübarizə apardığını və azarkeşlərə layiqli bir futbol təqdim etdiyini qeyd etdi. Mançester Yunayted üçün bu qələbə Premyer Liqada çətin dövrdən çıxmaq üçün vacib addım oldu.
